Rut 1 | TUCO | STEP | Muuŋ kat, yes Israela ledi kinik maau, ve tamtoghon todi pida tinim daba padi ve tiŋgin di. Sawa eez, pitool tiina ivot. Sawa tonenen, ŋgeu eez inepneep, iza Elimelek. Azuwa iza Naimi. Ve ndinatudi nditamoot ru, eez iza Malon, ve ite iza Kilion. Rumai todi Eprata. Paanu todi, nene Betelem to ineep ila taan suruvu to Yuda. Sawa to pitool tiina tonenen ivot, Elimelek yesuru azuwa ve ndinatudi ru tipul Betelem, ve tila tineep izi taan suruvu to Moap. Tinepneep tonowe irau ndaman pida.

Ruth 1

Elimelek yesuru azuwa ve ndinatu tila tineep izi taan suruvu to Moap, ve pataŋani tiina ivot padi

1 Muuŋ kat, yes Israela ledi kinik maau, ve tamtoghon todi pida tinim daba padi ve tiŋgin di. Sawa eez, pitool tiina ivot. Sawa tonenen, ŋgeu eez inepneep, iza Elimelek. Azuwa iza Naimi. Ve ndinatudi nditamoot ru, eez iza Malon, ve ite iza Kilion. Rumai todi Eprata. Paanu todi, nene Betelem to ineep ila taan suruvu to Yuda. Sawa to pitool tiina tonenen ivot, Elimelek yesuru azuwa ve ndinatudi ru tipul Betelem, ve tila tineep izi taan suruvu to Moap. Tinepneep tonowe irau ndaman pida. 3 Ghoro Elimelek imaat, ve Naimi toman ndinatu ru tonenen, yes moghon tineep. 4 Naimi ndinatu tivai Moap tidi ru. Eez iza Opa, ve ite iza Rut. Yes tineep tonowe irau ndaman saaŋgul, ghoro Malon yesuru Kilion anadi timaat. Tovenen Naimi inim naar ve inim kakam. Le azuwa maau, ve le ndinatu maau.

Naimi imuul ila pa ndug toni pughu

6 Naimi inepneep izi Moap, ve ilooŋ tighaze Yoova iuul tamtoghon toni Israela, ve igham aniiŋ tiina ivot ila taan todi. Tovenen Naimi yesŋa ndirawa liva ru timundig tipul taan to Moap, ve tighaze timuul tila pa ndug pughu to Naimi. 7 Tipul ndug to tinepneep pani, ve titaghon ataam to ila pa taan suruvu to Yuda. 8 Tilaghlaagh tila ve Naimi isaav pa ndirawa liva ru ighaze: “Aa, yamru amuul ala to nditinamim ve aneep toman di. Yamru lolomim ineep tuŋia inim tiou ve ndiran toit to timaat ne, ve agham poian ghei kat. Tovenen you nasuŋ pa Yoova naghaze igham poian gham paam. 9 Ye tau pale iuul gham ve avai muul. Leso ndizwamim matadi payam ve aneep pooi.” Naimi isavsaav le isob, ghoro yesŋa ndirawa liva tiwasavagun di ve titaŋ tiina. Titaŋtaŋ le isob, ghoro ndirawa liva tisaav pani tighaze: “Maau. Itiŋa tamuul tala to toŋvetaz tiom ve taneep toman di.”

11 Eemoghon Naimi ipamuul aliŋadi ighaze: “Ndinatug liva, yamru amuul ala pa ndug tiam. Azoorndug aghaze itiŋa tala pasa? Aghita. You irau napoop nditamoot ruta muul pa tivai gham ne maau. 12 Amuul ala pa ndug tiam. Pasa, you nanim liva waat wa. Irau navai muul maau. Ighaze you navai pa mboŋ to aazne ve napoop nditamoot ru, 13 irau yamru anepneep ve anamnaam le tinim ndolman, ghoro avai di? Maau. Aa ndinatug liva, you lolog isami kat. Pasa, pataŋani tiina to Yoova igham payou, nene igham gham paam.”

14 Yesuru tilooŋ saveeŋ toni tonene, ve tipamundigin taŋiiz muul. Titaŋtaŋ le isob, ghoro Opa isavag rawa liva, ve ipul di, ve imuul ila pa ndug toni. Eemoghon Rut lolo ineep tuŋia kat ila to rawa liva Naimi. Tauto lolo pa ipuli maau. 15 Tovenen Naimi isaav pani muul ighaze: “Ughita! Tazim liva imuul ila to tamtoghon toni ve maaron toni wa. Utaghoni ula.”

Rut imbua saveeŋ ighaze ye irau ipul Naimi maau

16 Eemoghon Rut ipamuul aliŋa ighaze:

“Uzoorndug ughaze napul ghom pasa?
You irau napul ghom ve namuul nala maau.
Ndug sine to yom ughaze ula pani, you pale nala paam.
Ve ndug to yom uneep pani, nene you pale naneep pani paam.
Tamtoghon tiom, nene tamtoghon tiou paam.
Ve Maaron tiom, nene Maaron tiou paam.

17 Sa ndug to yom uneep pani ve umaat, nene you paam pale namaat ve titavia ghou toman ghom izi tonanan.
Saveeŋ isob to nasavia di ne, ighaze nataghon di maau, nene pale Yoova tau ighur atia iza tiou.
Tovenen mateeŋ moghon to pale irab motin ghiit.”

Naimi yesuru Rut tila tivot izi Betelem

18 Naimi ighita ighaze Rut ŋgar toni iyaryaaŋ kat ighaze yesuru tila. Tovenen ye le saveeŋ eta muul maau, ve iyok pa yesuru tila. 19 Yesuru tilaagh tila le tivot izi ndug Betelem. Ival tiina to Betelem tighita di ve tisaŋeeŋ padi. Ve ndiliva pida tighason tighaze: “Wai, aghita. Nowe Naimi?”

20 Eemoghon Naimi ipamuul aliŋadi ighaze: “Yam awaat izag Naimi muul malep. Awaat izag ‘Mara.’ ^{▼▼(1:20) Pisis Naimi, pughu tovene: ‘Paghuna.’ Ve saveeŋ ‘Mara,’ pughu tovene: ‘Papaii.’}

Pasa, Maaron Ariaŋa To Ilib pa Ndimaronŋa Tisob Ne, igham nepooŋ tiou isami kat. 21 Sawa to napul ndug tonene ve nala, narau mbeb to naol. Eemoghon aazne, Yoova igham ghou namuul nanim toman nimag ŋginiŋa. Tauto naghaze awaat izag Naimi malep. Pasa, Maaron Ariaŋa To Ilib pa Ndimaronŋa Tisob Ne ighur pataŋani tiina iza tiou ve iwaghamun ghou.”

22 Nene kamos to Naimi to ipul taan to yes Moapa, ve yesuru rawa liva Rut to Moap tidi ne, ^{▼▼(1:22) Rut, ye Moap tidi. Yes Moapa tivot ila to Lot. Mose imbood tutuuŋ to iŋgalsekin yes Israela pa vaiuuŋ yes Moapa (Ughita Lo 23:3). Eemoghon kamos to Rut ipatooŋ ghiit ighaze Maaron lolo pa ndug tisob ve ighaze igham di tinim tamtoghon toni.}

timuul tila pa Betelem. Sawa tonenen, nene sawa to tiyou aniiŋ bali anoŋa.